அமெரிக்கா மீது மேலும் பல தாக்குதல்களை தொடுப்போம்

ஒஸாமா எச்சரிக்கை

கெய்ரோ, (எகிப்து), ஜன. 24

அமெரிக்கா மீது மேலும் பல தாக்குதல்களை வரிசையாகத் தொடுப்போம் என அல்- கய்தா தலைவர் ஒசாமா பின்லேடன் எச்சரிக்கை விடுத்துள்ளார்.

தாங்கள் பாதுகாப்பாக இருக்கிறோம் என்பதை கனவில்கூட நினைத்துப் பார்க்கக் கூடாது. பலஸ்தீன மண்ணில் நாங்கள் அமைதியை காணும்வரை பலஸ்தீனத்துக்கு எதிரான தாக்குதலில் இஸ்ரேலுக்கு நீங்கள் உறுதுணையாக இருக்கும்வரை உங்களை நிம்மதியாக இருக்கவிடமாட்டோம். உங்களுக்கு எதிராக தொடர்ந்து தாக்குதலை நடத்திக்கொண்டிருப்போம் என்றும் பின் லேடன் உறுதிபடத் தெரிவித்துள்ளார்.

கட்டாரில் இருந்து செயல்படும அல்- ஜkரா தொலைக்காட்சி சேவை பின்லேடன் பேச்சு அடங்கிய ஒலி நாடாவை வெளியிட்டுள்ளது. அதில் உரையாற்றியுள்ள பின்லேடன் மேற்கண்டவாறு அமெரிக்காவுக்கு எச்சரிக்கை விடுக்கும் தொனியில் பேசியுள்ளார்.

கடந்த கிறிஸ்துமஸ் தினத்தன்று நெதர்லாந்தில் இருந்து டெட்ராய்டுக்கு வந்துகொண்டிருந்த அமெரிக்க விமானத்தின் மீதான தீவிரவாதத் தாக்குதல் முயற்சிக்கு பொறுப்பேற்றுள்ள பின்லேடன் அமெரிக்கா மீது இன்னும் ஏராளமான தாக்குதலை நடத்தவுள்ளோம் என்ற தகவலையே அதன் மூலம் தெரிவித்துள்ளோம் என்றும் கூறியுள்ளார்.

உலக வர்த்தக மையத்தை தாக்குவதற்கு முன்பு எங்களது போர் நாயகர்களை (தீவிரவாதிகள்) அனுப்பி எப்படி உங்களுக்கு தகவல் அளித்தோமோ, அதேபோல இனிவரும் தாக்குதல் குறித்து உமர் பாரூக் என்ற போர் நாயகன் மூலம் தற்போது தகவல் தெரிவித்துள்ளோம் என்றும் அந்த கேசட்டில் பின்லேடன் தெரிவித்துள்ளார்.

ஒசாமா பின்லேடன் இந்த கேசட்டில் பேசியுள்ளதை உற்று நோக்குகையில் உலகம் முழுவதும் சதி வேலையை நிறைவேற்றி வரும அல்- காய்தாவின் கிளைகளை அவர் தொடர்ந்து தனது கட்டுப்பாட்டுக்குள் வைத்து அவற்றுக்கு வழிகாட்டுதலை அளித்து வருவது உறுதியாவதாக சர்வதேச அரசியல் நோக்கர்கள் கருதுகிறார்கள்.

முதலில் பின்லேடன் இறந்துவிட்டதாக கூறி வந்த அமெரிக்கா சமீப காலமாக பாகிஸ்தான்- ஆப்கானிஸ்தான் எல்லைப் பகுதியில் அவர் ஒளிந்துள்ளதாக கூறிவருகிறது.

சில தினங்களுக்கு முன்பு கூட இதே கருத்தை கூறியிருந்தது. இந்நிலையில் பின்லேடனின் பேச்சு அடங்கிய ஒலி நாடா வெளியாகியுள்ளது.

அவர் உயிருடன் இருக்கிறார் என்ற அமெரிக்காவின் நம்பிக்கையை மேலும் வலுப்படுத்தியுள்ளது. (து)